歇冬叉足电又爆过 基罗纳出闸赢畀你「体」

xcy232323

       


        经过约两周嘅冬休，西甲复赛即演前列大战，第2位嘅基罗纳主场迎战排第3嘅马德里体育会。基罗纳今季异军突起，上半季演出极度稳定，传控踢法又成熟又高效，攞到好成绩绝非侥幸，下半季有力保持强势，主场第一击有望用强大火力征服马体会，足智彩「让球」开平手盘，主队基罗纳值捧。 （Now 632周四凌晨4时30分直播）
        基罗纳喺休战前系西甲状态最好球队，近10场联赛拎到8胜2和佳绩，对上5次主场出击有4胜1和，球员信心爆棚。佢哋系西甲入波最多球队，近5场比赛轰入15球，火力足以摧毁西甲任何防线，歇冬叉足电後预期会有更好演出。
        基罗纳季前目标系护级，依家嘅成绩已经超额完成，就算「升呢」要抢欧联资格都形势大好，球员喺冇压力之下作战，落场更加得心应「脚」，杜夫比克、沙维奥、米基尔古迪利斯等主力都成为豪门挖角目标，为个人前途亦会施展浑身解数。
        马德里体育会喺歇冬前状态飘忽，近3场联赛1胜1和1负，前线除咗艾华路莫拉达同基沙文之外，就几乎冇球员识入波，令球队始终未能挑战更高排名。更大镬嘅系，对上两轮佢哋都有中坚被逐，土耳其守将苏恩古今场停赛，令防线再受打击。虽然马体会目前位居「3哥」，但攞分都系靠地利，客场表现差一大截，已经连续5场作客比赛失波，单计联赛更正值作客3连败，今仗面对气势如虹嘅基罗纳难免被睇低一线，平手盘拣主队相当稳阵。