域陀洛基着19号 获誉「新大哨」

xcy232323

       


        巴塞隆拿今季表现备受批评，箭头罗拔利云度斯基「减产」亦令球迷担心，不过球队上年夏天高价签入嘅巴西超新星域陀洛基，1月份强势加入，巴塞周二(2日)证实佢会着19号波衫，而且有望对拉斯彭马斯首演！前球会帕拉尼恩斯总监大赞佢系「新大哨」，有机会成为巴塞救星！
        巴塞季前用超过6,000万欧元罗致域陀洛基，但畀呢位18岁射手留喺帕拉尼恩斯磨练。眼见罗拔利云度夫斯基状态下滑，喺沙维要求下，巴塞今个月提前召域陀洛基归队。域陀洛基表示：「加盟巴塞实在难以置信，我细细个就支持巴塞，我有好多偶像，尼马、罗马里奥、朗拿度、朗拿甸奴全部都系伟大嘅模范。」
        域陀洛基已跟队操练几日，有机会喺对拉斯彭马斯一仗落场，帕拉尼恩斯总监马图斯日前接受西班牙传媒访问，亦睇好域陀洛基前途：「域陀洛基好似朗拿度，有好强嘅爆炸力同力量，有好高入球能力，有齐一切成为世界最佳前锋嘅条件。」「大哨」朗拿度喺96/97球季曾效力巴塞，上阵49场入47球，可惜只系踢咗1季就转会。