艾云东尼解禁在即 猛虎出笼入3球

xcy232323

       

        去年因违规赌波被重罚停赛8个月嘅艾云东尼，停赛令将会喺1月16日完结，自9月开始已归队复操嘅艾云东尼，周六(6日)喺闭门热身赛连中三元，带领宾福特B队以5比1大炒修咸顿U23。据报呢位英格兰国脚受到多间豪门挖角，但宾福特领队法兰克已表明无意放人。
        艾云东尼上季英超入20球，今季长期停赛下，宾福特依家排尾5卷入降班漩涡，艾云东尼解禁势成及时雨，如无意外今个月21日主场对诺定咸森林会正选复出。为帮艾云东尼提升状态，宾福特安排佢去B队踢热身赛，艾云东尼亦不负所托连中三元，状态相当理想。
        27岁嘅艾云东尼盛传受到阿仙奴同车路士挖角，转会费预计高达1亿镑，不过宾福特领队法兰克日前表明：「以我所知艾云东尼系宾福特球员，作为球队主帅，我希望佢会留队，我想留用最好嘅球员，佢嘅解禁就好似签咗个英超顶尖射手，我话事嘅话肯定唔会卖走佢。」