英格兰领队希望 卡域克等住再战英超

xcy232323

       

        随住朗尼早前被伯明翰炒鱿、谢拉特喺沙特执教成绩差劲，英格兰「黄金一代」唔识教波成为球迷热话，唯一曙光就系米杜士堡领队卡域克，呢位英格兰名将之前做曼联看守领队、上季执教米杜士堡都有杰出表现，据报唔少英超球会都吼实佢嘅发展，再战英超只系时间问题。
        《The Athletic》最近盘点英格兰「黄金一代」教波表现，朗尼、林柏特、谢拉特、加利尼维利、史高斯等全部唔合格，不过42岁嘅卡域克就得到好评，佢2021年短暂执教曼联3场拎到2胜1和，场均2.33分成绩系费格逊後曼联最高分领队；上季执教米杜士堡，将球队由21位带到去升班附加赛，可惜最後功亏一篑；今季卡域克已率米杜士堡杀入英联盃4强，有望制造奇迹。
        对於「踢而优则教」嘅风气，卡域克就有保留：「做领队唔容易，本身系咪球星根本唔关事，大家只会用你依家嘅成绩作判断，你过去有咩成就冇人会理。」卡域克嘅潜质有目共睹，之前纽卡素、水晶宫等球会盛传易帅，卡域克都喺候选名单上出现，而且佢身上有「曼联DNA」，如果教出好成绩，话唔定不久将来都有得上演「爱回家」。