韦斯咸英足盃出局 莫耶斯要求买人

xcy232323

       


        周三(17日)凌晨英足盃第3圈重赛，英超球会韦斯咸作客0比1不敌英冠嘅布里斯托城，成为今圈目前唯一一支被低组别淘汰嘅英超球队。韦斯咸今场有5名正选进攻球员缺阵，领队莫耶斯赛後表明今个月需要增兵，但唔保证可唔可以成事。
        韦斯咸上星期主场被布里斯托城逼和1比1，今仗重赛残阵出战，查洛保云、卢卡斯柏基达、米查利安东尼奥、柏保路科奴斯因伤缺阵，古达斯就踢紧非国盃，成条攻击线面目全非，结果开波3分钟就因後防失误被干维射入，下半场早段更有宾华马报复仇踢人食红牌，10人应战下韦斯咸返魂乏术，以0比1饮恨。
        中前场伤兵满营，宾华马亦将停赛3场，莫耶斯赛後直指冬季转会窗需要买人：「我哋有呢个需要(买人)，我同球会都一定会做嘢，但下一个课题系，有冇合适而且即时帮到队波嘅球员可以签呢？」据报韦斯咸依家目标锁定意大利前锋摩斯坚恩，佢已被祖云达斯挂牌，韦斯咸将提出借用至季尾。