【有片】拜仁赢柏林联 辛尼被掌掴爆冲突

xcy232323

       


        周四(25日)凌晨德甲，拜仁慕尼黑主场1比0击败柏林联，喺联赛榜4分落後「1哥」利华古逊。今场比赛充满火药味，拜仁翼锋利莱辛尼下半场曾被柏林联教练比积列卡「掌掴」，引发双方冲突。比积列卡赛後坚拒道歉，直指利莱辛尼系「先撩者贱」。
        拜仁上仗输畀云达不来梅後压力极大，今仗围攻柏林联，但搵唔到入波方法，上半场闷和0比0。新加盟嘅英格兰中坚艾历迪亚半场上阵，果然「好脚头」，拜仁换边後1分钟即由拉菲尔古里路入波领先。
        75分钟出现火爆一幕，利莱辛尼边线想拎波开界外球，比积列卡疑似霸住个波，利莱辛尼出手抢波，比积列卡就掴佢块面一下，双方推撞中比积列卡再次出手打中利莱辛尼面部，难逃被球证出示红牌命运，利莱辛尼亦拎到黄牌。双方後备同教练亦喺场边爆发冲突，情况混乱，拜仁最终保住1比0胜果。
        比积列卡赛後仍然愤愤不平：「我留喺教练指导区，准备畀个波佢，点知佢推我，我梗系要反击。如果要道歉，我只会向柏林联道歉，当然作为教练唔应该有呢种行为，但我唔会容忍辛尼，系佢挑衅我先。」拜仁教练杜曹就想息事宁人：「(比积列卡)行为梗系唔好，好难帮佢解释，但我唔想喺呢件事火上加油。」