纽卡素防线脆弱，车仔或轻松取胜

xcy232323

       

        今轮英超压轴战，车路士主场硬撼纽卡素。车仔系今季英超「神经刀」，表现极度飘忽往往估佢唔到，但「喜鹊」於联赛入得又失得，绝对系癫凤斗狂龙格局，3.5球入球大值得捧场。（Now 621及611周二凌晨4时直播）
        车仔近年疯狂使钱，高价买入多名具潜力嘅新星，好似安素费南迪斯、梅迪历、摩西斯卡些度及高尔彭马等，但阵中太多小将，确系需要一啲经验丰富嘅球员带住。可惜老将堤亚高施华同队长列斯占士伤多过踢，副队长芝维尔都系近期先复出，欠缺老大哥压场下，演出总系时好时坏。佢哋以「Under dog」姿态下可赢热刺、打和曼城同阿仙奴，但对住实力稍逊嘅宾福特、狼队同爱华顿就赢唔到，难以捉摸。其中上月英联盃决赛面对天残地缺嘅利物浦，被全面睇好下反而唔识踢，最终加时输波失冠，话佢哋系神经刀亦不为过。
        作客嘅纽卡素亦唔好得几多，呢支上季前4分子，谂住有大水喉入主後今季可以大展拳脚，点知自从欧联出局後好似散晒咁，加上伤兵一大箩，包括钢门尼克普比、哥林威尔逊同祖连顿等，真系冇晒计。
        其实单睇联赛，「喜鹊」27轮攻入57粒，火力唔算失礼，不过失咗45粒就犹如不设防，尤其系高大左闸丹般恩转身同速度慢，经常被对手针对成为缺口，右闸捷比亚今仗亦因伤倦勤，防守雪上加霜。睇番「喜鹊」近9场联赛只得3胜，有8次开4球或以上，今仗随时以攻代守，3.5球入球大更好路。